ساعات الواحد يكونو عندو تجارب قلال لكن يتعلم منهم بعمق.
كي تخرجت ما حوستش على خدمة لانني كنت نكره الوظيفة (وقتك وحياتك مش بيدك هذا لا يطاق!) لكن مع مرور الوقت خبطني الديقوتاج تاع الشوماج والشعور انني صفر خبرة خاصة وان تكويننا نظري، وقتها رجعت نحوس على خدمة..
المشكلة الاولى لي واجهتها هي البروفيتاج، يحبك تدمر تدمر ويسلكك قليل سيرتو كي تكون متخرج جديد تحشم وما عندكش خبرة يغلبك.. والبروفيتاج لا ابتلعه.. حطيت السيفي في اكثر من بلاصة والو ما يعيطوش.. مبعد كي لقيت خدمة او بالاحرى خدمات فهمت بعض القواعد لي تلقى بيها خدمة:
- العلاقات: مش معناها معريفة تضمنلك بلاصة، انما معريفة تجيبلك الاخبار. كي تكون عندك شبكة علاقات لاباس بها تعرف واحد يخدم في ادارة من استاذ قراك وديما تتناقش معاه ويوثق في كفاءتك منهيه صاحبك ولا صاحبتك ولا زملاء خدامين.. الخ، تجيب الخبر بلي فلان يحتاج خدام، الشركة الفلانية رح دير انترفيو.. الخ تروح تزدم (مش تحط السيفي وتمشي انما دير مقابلة).. العلاقات = مصادر للمعلومات => جماعة الجامعة اخدمو مليح على نقطة العلاقات تعلمو ما تكونوش منغلقين على رواحكم واخرجو من اسوار تخصصكم احضرو في الانشطة لي من ومن تفاعلو فيها ( تفاعلو باه تستمتعو وتتعلمو ههههه العلاقات رح يجيو تلقائيا)
- "أرني ما لديك": ال titre ما يجيبلكش خدمة، والشي لي حفظتو في قرايتك ما يجيبلكش خدمة، الشي لي عندو تأثير صح على صاحب العمل هو شخصيتك اساسا + فهامتك (مش حفاظتك): صاحب العمل رح يشوف جرأتك وحوارك معاه، استعدادك للتعلم وللاضافة في العمل، متواضع ولا متكبر، اخلاقك (اغلب مقابلات العمل لي فوتها كانو يركزو على هذا، كاين حتى لي يقولك "ما يهمنيش الدبلوم، يهمني انك متربي وخدام") والبعض رح يميز قدرتك على النقاش العلمي شغل تدي وتجيب معاه يحسك فاهم => جماعة الجامعة فترة القراية ماهيش باه تعمر الجمجمة تاعك وتفرغها في الكونترول برك.. ركزوا جدا على تعلم التفكير + بناء شخصيتكم (تعلمو تناقشو اساتذتكم، تعلمو تتحاورو مع لي اكبر منكم منصبا، ديرو انشطة في الجامعة تفتح عينيكم وعقولكم على الدنيا كيفاه ماشية تكون عندكم ولو فكرة صغيرة ..)
- حدد هدفك: بعد التخرج راك 0 خبرة، انت في موقف ضعف مش قوة باه تفرض الشروط تاعك، لهذا خلي هدفك انك تتعلم الواقع العملي كيفاه ماشي وتلم خبرة وعلى هذا الاساس لا تركز على تناسب الخدمة مع قدراتك ولا مع ال titre تاعك، نهار تولي عندك قدر لا بأس به من الخبرة وكي تقول "اجعلني على خزائن الأرض إني حفيظ عليم" تكون قدها لتم خمم تطلع النيفو..
مهم جدا هنا ان تفرق بين قبول الذل وبين التخمام لبعيد: كاين حوايج لي إيل فو با تتنازل عليها كرامتك وحقك فوق كل شيء، لكن كاين حوايج تحتاج موازنة وتخمام ذكي: لما تكون انت محتاج للخبرة وتكون صاحب رؤية فهذا "بيفرق كتير"، في تلك الفترة مليح انك تصبر على حوايج لي شوية ما يتبلعوش معاك لانو كيما مول الخدمة قاعد يبروفيتي عليك نتا تاني راك تبروفيتي عليه راك تلم في الباقاج لي جاي وقت وتبان نتيجتو.. خلي تخمامك لبعيد وتعلم من اي حاجة حداك حتى لو كانت تبانلك تافهة..
- لا تقولب ذهنك بدبلومك.
- لما حددت هدفي اول خدمة كنت رح نخدمها كان اي واحد يقدر يخدمها حتى لي ما قراش في الجامعة، صاحبة المؤسسة رفضت اني نخدمها وانا مهندس فوجهتني لشخص رح يفتح مشروع ويحتاج مهندس صناعي بسبب هذا بديت نتحرك وتعرفت على وش نقدر نخدم بدبلومي وعرفت شيئا عن حقوقي وكيفاه لازم نمشي وهادي تجيب هادي => لو رفضت فكرة اني نخدمها بحجة "oh je suis ،INGRNIEUUUUR" ما كنتش رحت للمؤسسة بالتالي ما كنتش نقابل مولاتها ولا نعرف السيد هاداك بالتالي كنت خسرت الكثير.. لا تتكبروا لانها اصلا مرحلة وتفوت
اخيرا: باه فرزت مخي وتفاهمت مع روحي حطيت عنوان للمرحلة لاجعل الامر ممتعا وارسخ في ذهني انني ماشي برؤية مش سبهللا، على خطى the pursuit of happiness " هذه المرحلة من حياتي تسمى التبهدايل" رايح نتبهدل ونتبخص ونغلط ونخلطها وتوجه الي الملاحظات ونحمار ونتقلق.. هههه عارف ما الذي اريده لذلك يا أهلا وسهلا بها.
ربي يوفقكم.
